Абай облысының әкімі бірқатар басқарма басшыларына ескерту жариялап, кейбіреулерін қызметінен босатты
Жиында президент тапсырмаларының орындалуы облыс әкімінің қатаң бақылауында екені айтылды.
Қала және аудан әкімдері, басқарма басшылары , өңірлік департамент жетекшілері қатысқан отырыста Президенттің хаттамалық тапсырмаларының орындалу барысы қаралды.
Аймақ басшысы жиында Президент Қасым-Жомарт Тоқаевтың қабылдауында болып, облыстың алдағы даму жоспарлары және өңірдегі қордаланған мәселелер туралы толық баяндағанын атап өтті. Облыс әкімінің айтуынша, аймақта тұрғындардың сұранысына қарай мектептер мен балабақшалар салу, мәдениет және денсаулық сақтау нысандарын жаңғырту қажеттігі туындап отыр. Облыс бойынша 2700 орындық 6 мектеп, 2100 орындық 9 балабақша, 3 аурухана, 2 емхана салуды және 17 колледж, 75 мектеп, 46 балабақша, 19 денсаулық сақтау нысаны күрделі жөндеуді қажет етеді. 1981 жылы салынған Семейдегі Абай атындағы облыстық қазақ драма театрында Достоевский атындағы орыс драма театры, "Дариға-ай" жастар театры бірге отыр. Өңірдегі 530 орындық, жалғыз мәдениет ошағын реконструкциялау керек. Аймақта бірде бір "Дарын" мектебі жоқ.
"Дегенмен облыстың оқушылары Кеңес заманы кезінде салынған ескі мектептерде оқып жатса да білім деңгейі жоғары. Олимпиадаларда жүлделі орын алып жүр. Мемлекет басшысы қабылдауда Үкіметпен бірге аймақты қарқынды дамытудың жолдарын қарастырып, өңірдің өзекті мәселелерін кезең-кезеңімен шешуді тапсырды. Бұл бізге үлкен жауапкершілік жүктейді. Ерекше атап өтерлігі, Президент Үкіметке облыста жаңа көп бейінді клиникалық орталық аурухананың құрылысын биыл бастауға, сонымен бірге Семейдегі Оқушылар сарайының құрылысын аяқтау үшін қосымша 8,6 миллиард теңге қаржы бөлуге тапсырма берді" — деді облыс әкімі.
Облыс әкімі жиында Президент тапсырмаларын сапалы, уақтылы орындау қатаң бақылауда болатынын ескертті.
"Қазіргі уақытта Мемлекет басшысының тапсырмасына сәйкес «Жайлы мектеп» ұлттық жобасымен 5 мектептің құрылысы жүргізіліп жатыр. Алайда Астанаға оның үшеуінің құрылысы желтоқсанда аяқталды деп ақпарат берілген. Біздің өңір үшін 5 мектеп аздық етеді. Халық саны бізбен қарайлас облыстарда кем дегенде 7-9 мектептен салынуда. Бұл мектептердің құрылысының тезірек аяқталуын ата-аналар мен оқушылар күтіп отыр" — деді облыс әкімі.
Аймақ басшысы облыс әкімінің аппаратына "Жайлы мектеп" жобасымен салынған мектептерді инфрақұрылымдармен тиісті деңгейде қамтамасыз ете алмағаны үшін құрылыс бойынша жауапты орынбасары Димитрий Гариковқа, Семей қаласының әкімі Талғат Мұратовқа, Бесқарағай ауданының әкімі Нұрбек Қошқарбаевқа, Энергетика және тұрғын үй коммуналдық шаруашылығы басқармасының басшысы Жандос Қайырхановқа тәртіптік жаза қолдануға ұсыныс енгізуді тапсырды. Білім саласында орын алған кемшіліктерге жол бергені, балалардың тәрбиесіне байланысты алдын алу шараларын тиісті деңгейде ұйымдастырмағаны, мұғалімдер мен білім саласындағы қызметкерлердің жалақысын уақтылы төлеуді қамтамасыз етпегені үшін Білім басқармасының басшысы Нұржан Ахметқалиевтің қызметінен босатылатынын айтты.
Ірі инвестициялық жобаларды іске асыру бойынша биыл облысқа 9,5 миллиард теңге жеңілдетілген несие берілген. Алайда берілген қаржы игерілмеген. Осы үшін облыстық әлеуметтік-кәсіпкерлік корпорациясының басшысы Абай Амангелдин жұмыстан босатылды. Ал жұмысты тиісті деңгейде ұйымдастыра алмағағаны үшін Ауыл шаруашылығы басқармасының басшысы Ертай Қуанбаевқа ескерту берілді.
Облыстағы халыққа қызмет көрсететін денсаулық сақтау ғимараттарының жағдайы да сын көтермейді. Өңірдегі нәресте мен ана өлімі республикалық орташа көрсеткіштен жоғары. Медициналық қызмет көрсету сапасына халық тарапынан арыз-шағым көбейген. Аймақ басшысы облыс әкімінің аппаратына Денсаулық сақтау басқармасының басшысы Талғат Молдабаевқа жұмысты өз деңгейге атқармағаны үшін тәртіптік жаза қолдануға ұсыныс енгізуді тапсырды. Жиында өз саласына қатысты ақпаратты дер кезінде ұсынбағаны үшін Мәдениет басқармасының басшысы Айбек Саматқа ескерту берілді.
Облыс әкімі Семейдегі аспалы көпір күрделі жөндеуден өтуі үшін жасалуға тиіс жобалық сметалық құжаттаманың ұзаққа созылып кеткенін де сынға алды.
"Көпірдің салынғанына 25 жыл болды. Президент 2022 жылы қыркүйекте Семейге келгенде көпірдің жобалық сметалық құжаттамасын жасауды тапсырған болатын. Екі жарым жыл болды, әлі жасалып жатыр. Былтыр Семейге келген көпірдің 25 жылда бірде бір рет жөнделмегеніне жапондардың өзі таңғалып кетіпті. Бұл көпір арқылы жылына 700 мыңға жуық көлік өтеді. Сондықтан жұмысты жандандыруымыз керек", — деді аймақ басшысы.
Облыс әкімі Президент тапсырмаларын уақтылы әрі сапалы орындауды қатаң бақылауда ұстайтынын жеткізді.
"Мен мемлекеттік қызметкерлердің жалған ақпарат беруіне, өзіне жүктелген функционалды міндеттерін немқұрайлы атқаруына жол бермеймін. Өздеріңіз көріп отырғандай, Мемлекет басшысының тапсырмалары тиісті деңгейде орындалмаған. Есеп дұрыс берілмеген. Жауапты мемлекеттік қызметкерлер жұмысты әлсіз жүргізген. Мемлекет басшысының, Премьер-министрдің, Президент әкімшілігі басшысының тапсырмаларын сапалы орындалуын қатаң бақылауға аламыз", — деді аймақ басшысы.
Жиынды қорытындылаған облыс әкімі қала-аудан әкімдеріне көктемгі су тасқыны кезеңіне дайындықты күшейтуді, қатаң бақылауда ұстауды тапсырды.
"Көктемгі су басудың қауіпті кезеңі Президенттің тікелей қадағалауында. Осы аптада Президент әкімшілігінің басшысы мен Үкімет басшысы су тасқынының алдын алуға байланысты үлкен жиын өткізді. Сондықтан сақтық шараларын күшейтіңіздер. Осы кезеңді төтенше жағдайсыз өткізуіміз керек", — деп қорытындылады аймақ басшысы.
Сурет: Абай облысы әкімдігінің баспасөз қызметі
